Ютре виплацованє цалей суми пензиї зоз додатнима 4.000 динарами, даєдни банки уплацели нєшка на рахунки

Министер финансийох Синиша Мали наявел же наютре, 10. априла, почнє виплацованє цалей марцовскей пензиї котра будзе звекшана за єднократну помоц у суми 4.000 динари.

Мали гварел же принєшена одлука же би ше марцовска пензия нє виплацовала у двох часцох, алє нараз и то вєдно зоз обецану помоцу пензионером.

Як сообщело Министерство финансийох, Мали наглашел же найстарши согражданє абсолутно заслужели же би були потримани и финансийно у тих чежких хвилькох, бо указали одвичательносц под час позарядового стану.

Даєдни банки у Сербиї нєшка на чечуци рахунки пензионерох уж уплацели полну суму марцовскей пензиї зоз додатнима 4.000 динарами.

И пензииї и додаток за найстарших согражданох може у банки подзвигнуц особа до котрей маю довирия котрей пензионер подписал овласценє, а виплацованє на шалтерох банкох почнє наютре.

Кед же пензионер вимагал од банки у котрей ма рахунок же би пенєж доставал на хижну адресу, поштар му принєше цалу суму зоз додатком.