Мирович, Вучевич и Пастор винчовали Вельку ноц по григориянским календару

Предсидатель Покраїнскей влади Иґор Мирович винчовал нєшка Вельку ноц беоґрадскому надвладикови Станиславови Хочеварови и шицким вирним котри тото найвекше християнске швето славя по григориянским календару.

У мено Покраїнскей влади и у свойо мено винчуєм вам наступне вельке швето, жадаюци же бисце го препровадзели у радосци и добрим здравю. Нєшка, баржей як скорей, потребни нам толеранция, солидарносц, медзисобне уважованє и любов, же бизме превозишли и витримали шицки спокуси у чежких часох.

Най нам вельконоцни швета – як символ побиди живота принєшу блгостан и добре здравє, наводзи ше у винчованки предсидателя Мировича.

Городоначальнїк Нового Саду Милош Вучевич винчовал вельке християнске швето шицким котри го означую по григориянским календару, жадаюци же би нас тота Велька ноц здогадла на найвисши вредносци котри и символизує, на любов, толеранцию и розуменє.

Предсидатель Скупштини Войводини Иштван Пастор у винчованки визначел же Вельку ноц дочекуєме у чаше преполним зоз спокусами, свидомши як скорей же єдни других мушиме чувац, робиц добре, медзисобно себе помагац, почитовац и щициц. “Най нам радосц котру Велька ноц приноши подарує моц, най нас виполнї любов же бизме зоз тих чежких часох вишли ище зложнєйши и моцнєйши, най шицким принєше здравє и виздравенє. Останьце дома за Вельку ноц, свидоми же у тей хвильки так найбаржей помагаце себе и другим” – визначел Пастор.